عدلات - طرق الاستفادة من اللبن القاطع , ماذا تفعلي باللبن اذا راب او قطع

الاول لازم تتاكدى ان ريحه اللبن مش فاسد وبعدين نقدر نستخدمه فى كم حاجة

1-ممكن يتشرب عادى زي اللبن الرايب لو قدرتى تتقبلي طعمه

2-مكن تعملى منه سلطة لبن رايب مع اى خضار تحبيه ورشة زعتر او نعناع

3-ممكن تحطى منه على التتبيلات للحوم بدل الزبادى

4-ممكن تعجنى بيه البيتزا والفطاير بيخليها هشه وطعمها احلى

5-ممكن تعملى منه شوية قرص تتاكل مع الشاى او الجبنة

الطريقه :

دقيق+لبن رايب+خميرة+رشه ملح+رشه سكر+حتة سمنة بلدي
*هنعجنهم كويس جدا مع بعض ونزود مية لو احتجنا اثناء العجين
*هنخبزهم دواير صغيرة كده بالحجم اللى نحبه ونسيبهم لحد ما يخمروا ونعمل حسابنا انهم هيرتفعوا بعد ما يخمروا
*هنرصهم فى صينية وندخلهم الفرن على نار هاديه لحد ما يحمروا من فوق ومن تحت وهيطلع معاكى احلى قرص طرية
لو عاوزاها ناشفه زودي شوية زيت وانتى بتعجنيها ورققيها شوية وقت الخبيز وخرميها بشوكة من النص بعد ما تخبزيها

6-ممكن تعملى منه مش
الطريقه :

*هتحطى على اللبن الرايب الملح والشطة وممكن عود قرفة وهتحطيه فى برطمان نظيف وجاف
*هتحطى فيه الجبنة القريش او اى بواقى جبنة عندك وممكن تحطى قشر البرتقال وقرون فلفل حار وممكن الطماطم الخضرة الصغيرة
*هترشي على وشه شوية زيت وتقفلى عليه كويس وتسيبيه فترة وتبقى تطلعى منه على الاكل عادى
*اهم حاجة بقى علشان نتجنب الدود تزودى الشطة شوية وتحطى شوية ترمس مسلوقين وشوية فلفل اسود حب مش مطحون

7-ممكن تعملى منه جبنه الجبنة من اللبن الرايب

الطريقه :

*هتنقلى اللبن فى قطعة شاش او قماش نظيفه وترشي عليه شوية ملح حسب ما تحبي (كل ما تزودى الملح هتطلع الجبنة جامده اكتر )
*اقفليها وعلقيها فوق الحوض تصفى ميتها وسيبيها وممكن تانى يوم اما تحسى انها جمدت قطعيها وانقليها فى علبه وتبقى عندك احلى جبنة
وممكن كمان تبقى تحطي معاها حتة قشطة هتطريها وتخليها احلى
المية اللى نازلة من الجبنة كمان ما ترميهاش ممكن تحطيها على المش او مع اللبن بتاع المعمر او تخبزي بيهم المعجنات برضه

8-ممكن تعملى منه لبنة باى نكهه تحبيها

الطريقه
لكل كيلو لبن هتضيفي معلقة كبيرة عصير ليمون ونص معلقة صغيرة ملح وتحطيها على شاشه تصفى ميتها وبعدين ممكن تعمليها باى نكهه تحبى تزودى عليها زيت زيتون او نعناع اوزعتر وانقليها فى علبه وعلى التلاجه يا جميل

9-ممكن تستفيدي منه كمان فى الرز المعمر زي ما قلنا

10-اوقات بعمل منه البسبوسة كمان يا جماعه بدل الزبادى وبيبقى جميل

11-ممكن كمان تعملى منه الكيك بدل اللبن