السلام عليكم ورحمة الله وبركاته
أخواتى العدولات
تعجز يدى عن الكتابة
لاقول أسباب غيبة طويلة جدا دامت شهور تجدد شكل المنتدى وزادت عضواته وغابت عنه أخوات ودخله أخوات جدد
بس اللى أقدر أقوله انكم وحشتونى جدا جدا ووحشنى المنتدى
عارفة انى غيب كتير واختفيت تماما عنكم وقلقتم عليا
سبب الغيبة غريب يمكن متصدقوش وأنا عارفة انى لو حكيت لكم هتقولوا مش ممكن ده يحصل
أنا دخلت المنتدى بشكل متقطع من شهر 9 واختفيت من شهر 12
اللى حصل الاغلبية عارفين ان زوجى سافر للخارج يشتغل زى كل زوج جاله عقد يسعى على رزقه ورزق عياله
وبدل ما يقول يا هادى وكتر يارب رزقنا
وأعوض زوجتى اللى تعبت سنين معايا وافرح اولادى بانى اوسع عليهم واجيب لهم كل ما يلزمهم واهنيهم
اختلق مشكلة من شهر 9 بدون سبب وعايز اننا ننفصل واخد الاولاد واربيهم وخلاص كدا شكرا
طبعا مش مصدقين
لكن اقسم برب الكعبة دا اللى حصل
مكنتش اعرف ان المال يعمل كدا فى البنى ادم يرمى ام اولاده واولاده عشان خاطر الفلوس وجمع الفلوس
تدخل اهلى عشان يحلوا الموضوع وتدخل عمه ولكن دون جدوى
فى الاخر قالولى سافرى يمكن ربنا يهديه لما يشفكم ويرجع تانى كويس احيانا المشاكل بتكتر لما الزوجين يكونوا بعيد عن بعض خصوصا
لما الزوجة تكون فى بيت العيلة وانا شقتى فى بيتهم
المهم سافرت اكتشفت حاجات كتيرة جدا
باختصار مش جوزى اللى عاشرته وكنت عارفاه
لقيته شخص تانى الشر جواه عايز يرجعنى تانى انا والاولاد باى طريقة وبرده
عايز يطلقنى المهم ان الطلاق يجى من ناحيتى عشان ما يدينيش مؤخر ولا نفقة ليا اتهنت واتشتمت ووصل للضرب كمان
وبعد ده كله رجعت تانى بيت ابويا بس تركت ولادى
هتستغربوا انى سبتهم هناك معاه ايوة سبتهم لانى اكتشفت من وانا لسه فى مصر انه عايز يطلقنى وارجع بيت ابويا وميصرفش على ولادى
مع العلم انى بعت ذهبى كله عشان يسافر بيه يعنى مبقاش معايا حاجة خالص
عرفت انه عايز يهرب منى انا والاولاد باى طريقة عشان يحوش براحته من غير اى عقبة فى طريقة
عشان كدا سبت له الولاد
هتقولوا قلبى جامد قوى
انهى ام تسيب عيالها يبعدوا عنها
انهى ام ترضى ان ولادها ميكونوش فى حضنها
بس انا فكرت بعقلى انا بدون وظيفة وتحفيظ القرآن اللى انا فيه اجره 200 جنية بس
هيقضوا تلات عيال اكل وكسوة ومدارس ودروس وادوية لا قدر الله لما يكون طفل فيهم تعبان وابوهم مرتبه كبير يعيشنا ويفيض
لقيت ان قلبى مش او عاطفتى مش هتنفعهم
هتقولولى ارفعى عليه قضية نفقة للعيال
حلنى المحاكم حبالها طويلة اصرف عليهم ازاى فى الفترة دى
كل زوجة فاهمة زوجها كويس قوى وانا ربنا كان منور لى بصيرتى لانه سبحانه وتعالى كان بيدينى اشارة فى منامى كل ليلة
بيهيئنى لاى شئ عشان اكون مستعدة لمواجهته
ادعولى ربنا يصبرنى على بعدهم وحشونى قوى
وادعولى ربنا ينصرنى وياخد حقى ويرجع لى فلوسى وحقوقى
نفسى احج واطلع على عرفات انا سافرت 35 يوم رفض فيهم يودينى عمرة
شفتم جبروت اكتر من كدا وقتها قلت لنفسى العبادة مش بايدك مش مكتوبة دلوقتى ربنا يكتبهالى مع محرم غيرك يكون قد كلمه المحرم اللى يصون عرضه
ادعولى ربنا يعوضنى خير فى حياة افضل
الدنيا تعبتنى قوى شفت كتير قسوة وحرمان حب وحنان
طولت عليكم وبعتذر لكم على غيبتى بس انا حكيت لكم على اللى كنت فيه من شهر 9
نسيت اضحكم معايا جوزى كان سفره فى شهر 7 واختلق المشكلة فى شهر 9
يعنى لما سافر شهرين عايز يخلع مننا
بالذمة مش
نكته هم يضحك وهم يبكى
بعتذر للادمن لانى قطعت بدون اسباب وانا رجعت مش طمع فى اشراف او شئ بس حبيت ارجع وسط اخواتى اللى وحشونى جدا
واقولكم المنتدى شكله جميل جدا بعد التجديد
بصراحة انا تهت فى الاول
بس عرفت ادخل لانه بيتى اللى فيه اخواتى
دمتم فى أمان الله
ووفقكم لما يحب ويرضى
السلام عليكم ورحمة الله وبركاته