الملك رمسيس التانى اقوي الملوك الفراعنة
رمسيس التانى
رمسيس التاني هو اعظم و اقوي الملوك اللي حكمو مصر على مر التاريخ الفرعون العظيم دا حكم مصر لمده سته و ستين سنه و شهرين و بيييجي ترتيبه التالت في ملوك الاسره التسع-ت-اشر اللي حكمت مصر في المملكة الحديثه.
رمسيس التاني ساب اثار رائعه من اشهرها معبد ابو سمبل معبد الائصر و معبد الكرنك. رمسيس التاني اتولد سنه 1303(ق ع ح) وعينه ابوه (سيتي الاول) ولي للعهد وهو عنده 14 سنه يادوب ووصل لمنصب الفرعون وهو عنده عشرين سنه. ويتقال انه عاش لحد ما وصل عمره 99 سنه بس على الارجح مات وهو عنده تسعين او واحد و تسعين سنه..ودفن في مقبره من مقابر وادي الملوك و جثته(الموميا بتاعته) معروضه حاليا في المتحف المصري في القاهره. رمسيس التانى بيعتبر أقوى فرعون عرفته مصر.
حياته
رمسيس التاني اتولد حوالى سنة 1303 قبل الميلاد , هو الابن التاني للملك سيتى الاول و امه هي الملكه تويا و اشهر زوجاته الملكه نفرتارى . وعند سن الاربعتاشر ، اتعين ولى عهد والده سيتى الأول. ويعتقد انه اخد العرش و هو في أوائل العشرينات من عمره و حصل على حكم مصر من سنة 1279 قبل الميلاد لسنة 1213 قبل الميلاد ليصبح مجموع مدة حكمه 66 سنه و شهرين و بيعتقد كتير من علماء الاجيبتولوجي انه خلف اكتر من 100 ولد و بنت.
الفرعون بعت حملات كتير لتأديب اعداء مصر في الشمال(سوريا و لبنان وفلسطين) و ليبا و النوبه. و من اشهر المعارك اللي بنيت عبقريته العسكريه معركه قادش و كمان كان الفرعون العظيم دا مهتم جدا ببنايه المعابد و المدن و بنى عاصمه جديده لمصر في دلتا النيل و سماها بي-رمسيس يعني المدينه العظيمه بتاعه رمسيس مات الملك العظيم سنه1213 (ئ ع ح ) بسبب امراض الشيخوخه و عمره فوق التسعين سنه بعد ما عاش اطول من كتير من زوجاته و حتى اولاده، و كان بيعاني من تصلب الشرايين و التهاب المفاصل.
مات الفرعون وهو سايب اثار في كل حته في مصر زي المقبره الرائعه اللي بناها لزوجته و محبوبته نفرتاري تسع ملوك من بعده اتسمو على اسمه رمسيس تكريما لذكراه بس ولا واحد منهم قدر ينافسه في العظمه و الانجازات. بعد موته ب ميه و خمسين سنه، انهارت الامبراطوريه المصريه الي حول يحافظ عليها ويوسعها.
معاركه الحربيه
الشهره الكبيره اللي نالها رمسيس التاني كانت بسبب معركه قادش بس دي كانت واحده من المعارك الكتيره اللي انتصر فيها على اعداء مصر و دي لسته باهم انتصاراته العسكريه
معركه شيردين البحريه ضد القراصنه اللي كانو بيهاجمو سفن البضايع المصريه في البحر المتوسط
الحمله الاول على سوريه و اللي عملها في السنه الرابعه من حكمه وسجلها للتاريخ على حجر موجود لسه لحد دلوئتي في مكان قريب من بيروت و اسر فيها امير فلسطيني و جابه معاه لحد مصر كاسير حرب
الحمله التانيه على سوريه المعروفه باسم معركه قادش و الي قام بيها الملك رمسيس في السنه الخامسه من حكمه و هي جزء من الحرب اللي كانت مستمره بين المصريين و الحيتيين حوالين مد النفوذ و توسيع المستعمرات. المعركه حصلت سنه 1279 (ئ ع ح ) و هي بتعتبر اكبر معركه في التاريخ من حيث عدد العجلات الحربيه اللي شاركت فيها(مابين خمس-ت-الاف و ست-ت-الاف عجله حربيه).
اتجمعت جيوش من اكتر من عشرين دوله من وسط هضبه الاناضول و شمال سوريه و اتحدت ضد جيش مصر و عملو له كمين و قدروا يدمرو جناح كامل من الجيش المصري لكن رمسيس التالت قدر ينجو من الموت و حافظ على معظم جيشه ووصل بيه لحد مصر. ايه الي حصل بالظبط في المعركه دي لسه محل خلاف بين العلما لأن الجانبين المصري و الحيتي كل واحد بيقول انه حقق انتصار كبير على الطرف التاني.على جميع الاحوال الحاجة الوحيدة اللي الطرفين متفئين عليها هي انها كانت معركه عظيمه و كبيره
الحمله التالته على سوريه
يبدو ان هيبه الجيش المصري اتهزت بعد موقعه قادش فابتدا الامرا الكنعانيين في الثوره ضد الحكم المصري( و طبعا بدعم من الحيتيين العدو الاول لمصر). في السنه السابعه من حكمه رجع رمسيس التالت لسوريه و نجح المره دي في انه يحقق انتصارات اكبر من اي مره فاتت ووصل بجيشه لحد القدس و اريحا و حتى ل دمشق و ما بعد قادش
حمله النوبه و قام بيها وهو عنده 22 سنه و بنا هناك معبد سجل فيه انتصاراته
حمله ليبيا مافيش تسجيلات مفصله لحملات عسكريه ضخمه على ليبيا لكن في اثار و قلاع مصريه في الساحل الشمالى بتشير لنوع ما من التواجد المصري التاثير السياسي في المناطئ دي.
معاهده السلام
القائد العظيم هو اللي بيدرك ان في حروب مش ممكن الانتصار فيها من دون خساره كل شيء. رمسيس التاني في السنه الخمسه و عشرين من حكمه وصل للحئيئيه دي وقبل و قرر يعمل معاهده سلام مع اعداءه الحيتيينو حرر المعاهده من نسختين واحده باللغه مصريه القديمة واحده بللغه الاكاديه. النسختين متطابئتين في معظم النصوص بس بيختلفو في حته من طلب السلام: الحيتيين في نسختهم بيئولو المصريين طلبوا السلام و المصريين في نسختهم بيئولو الحيتيين هم اللي طلبو يوقعو المعاهده. المعاهده محفوره بالكامل في معبد الكرنك و متكونه من تمن-ت-اشر بند و وقع عليها رمسيس التاني و حاتوسيلي التالت ملك الحيتيين.
المعاهده دي بتعتبر اول معاهد سلام في التاريخ و هي اللى انهت سنين طويله من الحروب بين الامبراطوريتين المصريه و الحيتيه.
سفر الخروج
قصه خروج اليهود من مصر بقياده موسى مذكوره في القران و العهد الجديد(الانجيل) و العهد القديم(التوراه)و على الرغم من ان مافيش اي دليل علمي او وثيقه تاريخيه بتشير للحادثه دي لكن الملك رمسيس التاني كان متهم من وقت طويل انه هو فرعون الخروج اللي مات غرقان في البحر الاحمر و هو بيطارد اليهود .
سنه 1974 لاحظ العلما ان موميا الملك في حاله سيئه و قررو يسفروها لباريس علشان يعالجوها هناك و دي كانت فرصه لعلما اللاجبتولوجي والانثروبولجي لدراسه الجثه و انتهت الدراسات دي ان الملك رمسيس التاني مات بسبب امراض الشيخوخه و مش بسبب الغرق يمكن بسبب التهاب المفاصل و الاسنان. الفرعون طلع له باسبور مصري قبل ما يسافر و مكتوب في خانه الوظيفه ( ملك مصر الراحل). ولما وصل فرنسا عملو له استقبال عسكري مهيب في المطار.
تمثال و ميدان رمسيس
اتنقل تمثال رمسيس الثاني في اول الخمسينيات و اتنصب في اشهر ميادين القاهره (ميدان باب الحديد) و بقى اسمه ميدان رمسيس تكريما للفرعون الجليل وف سنه 2006 قررت الحكومه المصريه تنقله من ميدانه المشهور اللي في وسط القاهره قدام محطه مصر وحطوه في منطقه الأهرامات في محافظه الجيزه علشان يرمموه لحد ما يخلصوا المتحف المصري الجديد في ميت رهينه على طريق مصر اسكندريه الصحراوي و خدت عمليه النقل حوالي عشر ساعات في يوم الجمعه 25 اغسطس 2006 و اتجمع الاف من المصريين على جنبين الطرييق علشان يودعو تمثال الملك العظيم اللي عاش و مات و لسه باقي كرمز ل مجد و عظمه مصر.
إظهار التوقيع
توقيع : ريموووو
التوقيع لا يظهر للزوار ..
رد: الملك رمسيس التانى اقوي الملوك الفراعنة
إظهار التوقيع
توقيع : لؤلؤة الايمان
التوقيع لا يظهر للزوار ..
رد: الملك رمسيس التانى اقوي الملوك الفراعنة
عظيمه يا مصر
إظهار التوقيع
توقيع : بسم الله
التوقيع لا يظهر للزوار ..
رد: الملك رمسيس التانى اقوي الملوك الفراعنة
إظهار التوقيع
توقيع : عاشقة اولادى
التوقيع لا يظهر للزوار ..
رد: الملك رمسيس التانى اقوي الملوك الفراعنة
مشكوررررره على هذا
الموضوع
الموضوع
قد تكوني مهتمة بالمواضيع التالية ايضاً
|
||||
| الموضوع | كاتب الموضوع | المنتدى | ||
| الملك اووفـــا ريكــــس حــاكــم انجلتــرا المسلـم !,من هو,ماذا تعرف عنه | ربي رضاك والجنة | شخصيات وأحداث تاريخية | ||
| تكملة قصة حكاية زواج الملك بدر باسم بن | عطور الجنه | قصص - حكايات - روايات | ||
| حكاية زواج الملك بدر باسم بن شهرمان ببنت | عطور الجنه | قصص - حكايات - روايات | ||
| عبد الملك ابن مروان | زاهرة الياياسمين | شخصيات وأحداث تاريخية | ||
| مينا موحد القطرين | توتة واحلى بنوتة | شخصيات وأحداث تاريخية | ||
الساعة الآن 04:53 AM
جميع المشاركات تمثل وجهة نظر كاتبها وليس بالضرورة وجهة نظر الموقع