تعالوا نعمل دماغ ناس

عايزين تعملوا دماغ بس دى مش اى دماغ دى دماغ.........‏
بس المرة دى مش اي دماغ
هتعملى دماغ بالناس
يعنى اسمها
( دمــــــــاغ نـــاس )
ايـــــه دماغ ناس دى ؟؟..





- دماغ ناس .. زى دماغ قهوه .. دماغ لب وسودانى .. تعمل دماغ " ناس"..
بص ياسيتى ..





لو فى يوم لقيتى نفسك متضايقه ومخنوقه وملكيش نفس تكلّمى حد ومش لاقيه حاجه تعمليها ..
إنزلى الشارع إتمشى لواحدك و تأمّلى فى الناس ..
هتلاقى الموضوع مسلّى جداَ ..
الشعب المصرى ده لذيذ طحن ..
دماااااغ



......


* هتلاقى ناس طالع عين أهلهم فى أتوبيس فيه 186 واحد والناس طالعين من الشبابيك والجو حر ..
والناس لسّه بتركب وهى مبتسمه وحاسه بالكفاح ..
وتلاقى واحده ست تخينه – غالباَ موظفة – دخلت وسط الـ 120 واحد اللى واقفين على الباب واخترقت الجموع فى براعة ورشاقة تحسد عليها ..
سبحان الله


* بنت لابسه هدوم المدرسة ومزوغة ماشيه مع ولد
– ممكن تحلف إنه مش هيلاقى شغل ولا بعد 100 سنه من شكله –
وإن لقى.. أول حاجه هيعملها أنه يسيب البنت دى ..
كفايه فقر بقى ..



* واحد ومراته - كبار فى السن – ماشيين على الكورنيش بياكلوا ترمس فى منتهى السعادة والأمتنان ومش عايزين حاجه تانيه من الدنيا ..



* واحد شكله تعبان طحن ومش لاقى ياكل، بس جايب أحدث " الموبايل " وبيتكلم فيه بصوت عالى فى وسط الشارع..
عشان هو حر ..







* واحد عمره ما شاف الزبدة فى حياته ولا يعرف بتستخدم فى أيه أساساَ ..
عاملين معاه لقاء فى القناة الثالثة بيسألوه عن رأيه في مقاطعه المنتجات الدنماركية ..
قلهم " أه طبعاَ انا مع المقاطعه دا واجب وطنى يا جماعه أنتوا بتتكلموا إزاى .. "



* واحد واقف مع خطيبته/صحبته قدام قفص الأسود فى جنينه الحيوانات
بيقولها : " بصى .. أهو ده بقى أسد .. !!! " شاعراَ بأنه قد منحها العلم والمعرفه المطلقة وأسرار الكون ..



* بنات بكرش لابسه بديهات ستومك.. عشان دى الموضه ..



* أسره مكونه من 4 أفراد أب وأم وبنت شابه وولد فى أعدادى قاعدين فى Café ..

طلبوا عصاير وشيشتين .. مين اللى شرب الشيش ؟! .. البنت وأمها .. حاجه تغيظ... !!


* من مدة كده كان فى ماتش للأهلى و فريق تانى .. كان فيه 2 منقبات بيشجعوا فى المدرجات !! .. و واحده منهم كانت لابسه نقاب أحمر .. تشجيع بقى .. صباح التهييس ..




جربى أنتى كمان تعملى دماغ ناس ..
هتلاقى الموضوع مسلّى جداَ .. و أبقى قللنا إيه رأيك ..
وفتكم بعااااااااااافيه