أو

الدخول بواسطة حسابك بمواقع التواصل

#1

Fly ملحقتيش تستعدى لرمضان ... برضه هوفرلك وقتك

فى مننا مستعديتش ولا فرزت ولا خزنت حاجه اما بسبب ان مفيش ديب فريزر او زنقه وقت

مفيش مشكله هعرض عليكم افكار انا شخصيا فى منها عملتها وفى منها هعملها ان شاء الله

يعنى انا اه خزنت حاجات بس برضه مش عايزه اخد وقت برضه فى المطبخ عايزه اجهز حاجات تختصرى وقتى فى المطبخ وكمان تساعدنى ومحسش انى قضيت وقت كتير فى المطبخ كمان وبصراحه عشان

انا بحس يا بنات والله ان المطابخ دى اكتر حاجه بتتظلم فى رمضان يعنى طول النهار واقفه فى المطبخ وملياه دخان وبخار واشيقلى واشئ شوى وتقريبا بتفتحى كل درفه وبتستخدمى معظم المواعين

طيب ليه احنا اتفقنا ان رمضان شهر عباده مش معنى كده مش هناكل بس ازاى نعمل الاكل فى وقت قياسي وكمان منبهدلش المطبخ عشان ميحتاجش منك تنظيف بالساعه بعد كده

طبعا فى كتير مننا حضرت حاجات كتير وفرزناها سواء مقبلات سواء خضار وفواكه للعصاير سواء صوانى وكمان اللحوم و وكمان الحلويات

طيب واللى محضرش ومخزنش او اللى معندهاش ديب فريزر ومطضره تعمل اكل كل يوم او يومين فى رمضان

متقلقيش هساعدك بحيث اوفرلك شويه من وقتك



اولا
لازم نتفق ان مطبخنا دايما يكون زى الفل مفيش معلقه ولا شوكه فى الحوض مفيش كوبايه ميه على الرخامه

يعنى اتسحرنا الحمد لله مينفعش ننام الا لما نكون مخلصين مواعين السحور

طبعا احساسك وانتى بتبدأى يومك وبتدخلى مطبخك تصبحي عليه وتبدأى تحضرى الاكل وهو فله شمعه منوره احساس جميييييل اوى



ثانيا:
خلى معاكى فى مطبخك راديو او mp3 وشغلى قران او درس تسمعيها

بصراحه انا بعمل كده بس بحب اسمع كمان وخصوصا اول كام يوم فى رمضان اسمع اغانى رمضان

مرحب شهر الصوم و كمان اهو جه ياولاد

بجد بعشق الاغانى دى وبتدينى فرحه جميله اوى فى قلبى وتخلينى فرحانه اوى وانا بعمل الاكل





يعنى لازم تحسسي نفسك برمضان



ثالثا:
هتكونى عامله قايمه بالاكل بتاعك عشان متحتاريش وطبعا المنتدى مليان منيوهات اكتر ن رائعه مش بس فطار لا فطار وسحور وحلو وحادق وكل حاجه



رابعا :
نوته صغيره عندك فى مطبخك وكاتبه فيها تتبيلات جميع انواع اللحوم وتكون عندك دايما عشان متنسيهاش دى بقى بعملها على طول عشان مش بحب اتبل اللحوم بتبلها قبلها بيوم بس

طيب دلوقتى هقولك على بعض حاجات هتجهزيها ودى اساسي عندنا سواء مفرزين اكلنا لرمضان ولا لأ

الافكار دى مطلوب عباره عن مجموعه برطمانات وزجاجات هنحضر فيها حاجات تسهلنا شويه الاكل والحلويات



يعنى هنحتاج لكميه من البرطمانات والاوراق



1- خلطه قلى البانيهات والبفتيك والكوردن بلو

انا بصراحه هى خلطه واحده بعتمدها لقلى البانيه البفتيك

وهى عباره عن بقسماط ناعم مع فجيتار انا بحط ( 3 اكياس عادى و3 سبايسي ) ومعاها حبه بهارات وقرفه ناعمه وسمسم وشوفى الملح فى الغالب هتكون ملحها مظبوط لان الفجيتار بحسه ملحه زايد شويه

وده اول برطمان عندنا يكون جاهز وحاولى تعملى كميه تكفى رمضان كله



2- خلطه الدقيق المملح

هنجيب الدقيق ونحط عليه كل التوابل اللى عندك وكمان مرقه فوريه وبرضه فى برطمان ودى برضه للبانيهات وكمان الفراخ المقرمشه

وخليها قاعده عندك( دقيقء مملح وبعدين البيض وبعدين البقسماط بالفجيتار )



3- خلطه الدقيق المملح مع الرده

ودى بقى للكبده بالرده وعرفتها من شيف ربنا يبارك فيه وطلعت تحفه

هنجيب الدقيق المملح وعليه رده ناااااااااعمه بنسب متساويه



4- خلطه الفراخ المقرمشه

عندك خلطتين انا واحده معتمداها والتانيه لسه هجربها بصراحه

( الدقيق الدره مع الفجيتار) واللى لسه مجربتهاش ( الدقيق المملح والميه الساقعه)



5- السمك المقلى


عباره عن دقيق مملح بسيط مع نشا بيطلع تحفه ومقرمش وخطييييييييير



6- خلطه توابل الفول

طبعا فى السحور اساسي عندنا الفول برضه نسهل عمايله شويه ونجمع توابله فى برطمان واحد

يعنى المقدار عندى بيبقى عباره عن م ملح + نص معلقه من الفلفل الاسمر والكمون والكسبره الناشفه + ربع م شطه




7- خلطه السلطه

عباره عن ملح وفلفل وكمون وكسبره وشطه وبهارات مشكله ومكن الخل واللمون وزيت واحتفظ بها فى التلاجه ودى بعملها كل اسبوع فى برطمان وفى التلاجه بتخلى السلطه جمييله اوى


8- خلطه الكبسه
ودى هنعملها عباره عن اكياس صغيره فيها كل المكونات كل كيس على قد الاكله

يعنى انا بعمل كوبايتين رز بس هنجيب الكيس الواحد واحط فيه الكارى والكركم والبهارات وقرفه الناعمه والملح وورقتين اللاورو وكام عود قرنفل وكام حبهان ولمونه لومى وكام عود قرفه ومعاهم كمان مكعب دجاج متغلف بورقته ) وده كيس الاكله واحط فى البرطمان كام كيس كده



9 – خلطه شوى الفراخ المعتمده عندك برضه تعملها فى برطمان وتكون جاهزه عندك



10- برطمان هنحط فى نصه سمنه ونكمل نصه التانى زيت

انا بقى ده اهم برطمان عندى عشان بكسل اوى اخد السمنه واسيحها شويه عالنار وبعدين احط عليها الزيت ياااااه بحسها شغلانه

انا بعمل البرطمان ده وبيكون جاهز وسايل لاننا فى الصيف وبيكون جاهز عندى لدهن اى حاجه شويه سمبويه فى الفرن للفراخ فى الفرن لرقاق لجلاش سواء حلو او حادق


11- برطمان هنحط فيه المكسرات المفرومه مش ناعم اوى لحشو القطايف والكنافه

12- خلطه حشو الجلاش
فانا معتمده طريقه حلوه اوى لحشو الجلاش عباره عن كوب سودانى مطحون مع كوب بقسماط مطحون مع معلقتين قرقفه ومعلقه سمنه على النار يتحمصوا واحشي احلى جلاش هتاكليه فى حياتك

فبعمل الحشو البقسماط على السودانى على القرفه ويادوب وقت ما اعمل الجلاش اضيف على المقدار اللى عاوزاه معلقه سمنه واحشي على طول

13- المشمشيه والقراصيا والتين يتقطعوا مكعبات صغيره وبرضه فى برطمان فى التلاجه للخشاف

14- برطمان بالمكسرات نااااااااااعمه اوى معاهم قرفه وده لتزيين اطباق المهلبيه والكاستر وخلافه

15- الكيك

انا عرفت طريقه حلوه اوى لكيك اسمها كيك الخلاط عباره عن 4 بيض +3/4 كوب زيت+ 1كوب لبن+ 1/2 1كوب سكر + 2.1/2 كوب دقيق + م ص فانيليا + م ك بيكنج باودر

وكل ده بيضرب فى الخلاط وبيتخبز فى فرن درجه حراره 180


فهعمل مقدار صينيه فى كيس عباره عن الدقيق مع السكر مع الباودر مع الفانيليا وده يكون جاهز عندى



16- البسبوسه
انا بستخدم حلو الشام حلوه معايا بس بعمل نص الكيس بس عشان متقعدش وتنشف وتترمى فى الاخر فباخد كل نص كيس واضيف عليه الباودر بتاعه واحتفظ به فى التلاجه

ووقت ما اجى اعملها اجيب نص الكيس بالباودر واحط عليه كوب زبادى وعلقتين سمنه وشويه ميه



17- طبعا الشربات نعمله ونحطه فى زجاجه فى التلاجه



18- ممكن نعمل السلطه فى اكياس ونحطها فى التلاجه تكفى اسبوع

يعنى انا بحط فى كل كيس 2 طماطم و1 خيار و1 جزر و1 فلفل رومى و1 فلفل اصفر وكام عود كزبره خضرا

( دى بصراحه بعملها عشان اخلى بنتى حبيبتى تجيبهالى وانا فى المطبخ



19- الصلصه

طبعا بنحتاج كتير صلصه جاهزه من السوبر ماركت لوصفات كتير انا بعملها زى الجاهزه واحطها فى برطمان واحط على وجها زيت زيتون واحتفظ بها فى التلاجه

20- العصاير
لو مش مجهزاها فى الفريزر هتعمليها لمده اسبوع مركزه وتحتفظى بها فى التلاجه زى التمر المنقوع يتنقع ويتصفى ويتشال فى زجاجه مركز والدوم والخروب والكركديه والقمر الدين وهكذا


21- طبعا البلح متفصص وجاهز فى علبه كبيره محكمه الغلق او حتى شنطه بلاستيك عشان المكان



22- فى برطمان كبير ممكن نحمص كيلو شعيريه ويكون جاهز عندنا وممكن برطمان صغير لسان عصفور مع ان الحر ده مش عاوز اى شوربه



23- التوميه

تعمليها وتحتفظى بها فى برطمان بتنفع فى انواع كتير من السلطات مع المايونير



24- الكاتشب

كذلك انا بعمله وبحطه فى الازايز بتاعته وفى التلاجه للاكل او فى التتبيلات



لو عجبكم الموضوع هكمل ولو معجبكمش برضه هكمل هههه




وكل سنه وانتوا طيبين ورمضااااااااااان كريم
منقول


#2

افتراضي رد: ملحقتيش تستعدى لرمضان ... برضه هوفرلك وقتك

شكرا على موضوعك الرائع
إظهار التوقيع
توقيع : جوجل
#3

افتراضي رد: ملحقتيش تستعدى لرمضان ... برضه هوفرلك وقتك

كل عام وانتى بخير
إظهار التوقيع
توقيع : جوجل
#4

افتراضي رد: ملحقتيش تستعدى لرمضان ... برضه هوفرلك وقتك

كملي حبيبتي براحتك تسلمي موضوعك حلو ومفيد للعائلات الي عدد أفرادها كبير
إظهار التوقيع
توقيع : لؤلؤة الايمان
#5

افتراضي رد: ملحقتيش تستعدى لرمضان ... برضه هوفرلك وقتك

تسلمى ياقمر
#6

افتراضي رد: ملحقتيش تستعدى لرمضان ... برضه هوفرلك وقتك

شكرا على الموضوع الروعه
إظهار التوقيع
توقيع : طماطم
#7

افتراضي رد: ملحقتيش تستعدى لرمضان ... برضه هوفرلك وقتك

كل عام وانتى بخير
إظهار التوقيع
توقيع : طماطم
#8

افتراضي رد: ملحقتيش تستعدى لرمضان ... برضه هوفرلك وقتك

موضوع جميل تسلمي
إظهار التوقيع
توقيع : ام التسابيح
#9

افتراضي رد: ملحقتيش تستعدى لرمضان ... برضه هوفرلك وقتك

تسلمى


قد تكوني مهتمة بالمواضيع التالية ايضاً
الموضوع كاتب الموضوع المنتدى
كيف تستعدى لرمضان ؟؟؟ بوسى كات M عدلات في رمضان


الساعة الآن 03:19 AM

الاتصال بنا - عدلات - الأرشيف - أعلي الصفحة

جميع المشاركات تمثل وجهة نظر كاتبها وليس بالضرورة وجهة نظر الموقع


التسجيل بواسطة حسابك بمواقع التواصل