كبسولة تربوية ل"فاطمة المهدى-مستشار تربوى" ادخلوا هاتستفيدو للاامهات

فى الحياة حاجات كتير ...فيها الحلو...وال(.....)
وانت اللى بتختار طريقك..خطواتك...اللى هتوديك ناحية الحلو أو ال(...)
أول ما ابتديت حياتى اشتغلت الحاجة اللى مكنتش أتوقع أبدا إنى اشتغلها
وكنت من وانا صغيرة باقول أنا هاشتغل أى حاجة إلا الشغلانة دى
لأنى كنت باكون مشفقة ع الناس اللى بيشتغلوها
مجهود كتير...فلوس قليل...للأسف
اشتغلتها عشان زى ناس كتير ما بتقول...أهى شغلانة والسلام
بس اكتشفت مع أول يوم..انى مش باحب الشغلانة دى وبس...أنا باعشقها
اشتغلت مدرسة...لا وكمان إيييه مدرسة (kg)
بعدها اشتغلت مع السن الاكبر...واللى كان تحدى أكبر...المراهقين
أى نعم...المراهقين كان تحدى أكبر من الاطفال..بكتيييير
بس مع الوقت حبيت عالمهم ..طريقة تفكيرهم..ابداعاتهم اللى اوقات بنشوفها جنون..طريقتهم فى الحوار..حتى لو مختلفة معاهم ...اتعاملت مع نفسياتهم...كل حالاتهم...فرح -حزن-غضب-توتر وقلق
وقفت كذا مرة قدام مشكلات كانت تعتبر جديدة علىّ
بدأت اقرأ ...أدوّر...يعنى ايه مراهق؟
يعنى ايه نفسية مراهق
ليه بيكونوا سبب مشاكل ف بيوت كتير...ليه متقلبين فى مزاجهم...ليه بيحسوا اوقات بالاضطهاد
أسئلة كتير وانا لسه اول سنة خبرة
ومن هنا كانت البداية...السؤال
اول ما تلاقى نفسك بتسأل ..تعرف انك عايش
حطيت رجلى على أول الطريق بعد أول سنة تدريس
من خلال شغلى مع المراهقين والأطفال قررت إنى أدرس أكتر واتعلم أكتر عن علم النفس والصحة النفسية
كملت دراسات عليا..رغم انى كنت باشتغل وعندى 3 اطفال بس بفضل الله ثم إصرارى ربنا سبحانه وتعالى أعاننى ..
طبعا فيه عوائق...لكن مفيش لذة من غير عوائق...ولا إيه؟؟
بعد ما خلصت دراستى
أخدت قرار يعتبر من أهم قرارات حياتى
أنا مش عاوزة أكون مُدرسة...
أنا عاوزة أكون الإيد اللى بتساعد المدرسين وأولياء الامور عشان يقدروا يساعدوا أولادهم
وخاصة المراهقين
ومن هنا كانت البداية
بداية البداية
إنى اخترت اللى احب اعمله ...عالم المراهقين