دليل سنه اولى للام المبتدئة ** تحذير : للحوامل ومرهفى الحس متقروش

إضافة رد أضف للمفضلة حذف من المفضلة

https://adlat.net/showthread.php?t=259521

بياناتي

ام الين و الياس

![بنــوتــة منآضــلة]!

بيانات العضوة

رقم العضوية : 89206
تاريخ التسجيل: 123May 2015
الدولة : تركيا
المدينة : اسطنبمول
الحالة الاجتماعية : متزوجة
الوظيفة : طالبة جامعية
المشاركات: 114 [+]
الأصدقاء : 30
نقاط التقييم : 10

دليل سنه اولى للام المبتدئة ** تحذير : للحوامل ومرهفى الحس متقروش

بسم الله .حمدا و صلاة و سلاما على رسول الله

دليل سنه اولى للام المبتدئه

** تحذير : للحوامل ومرهفى الحس متقروش

1 . الامومه مش سهله و مش شبه الى بتيجى فى الافلام الاجنبى والعيال مبتكبرش بسرعه زى المسلسلات العربى
2. مهما حاولتى ابنك / بنتك هتقع و هتتخرشم و هتاكل م الارض وهيجيلها اسهال
3. حياتك القديمه انسيها او بلاش تفتكريها عشان متتقهريش " ايموشن بيلطم "
4. اعتبري نفسك مخلفه قرد وتوقعى وجوده فى اى حته فوق التلفزيون / تحت السرير / جوه سبت الغسيل / ف الرف الى تحت من دولاب المطبخ متستغربيش وحياة والدك
5.الغسيل اعتبريه تؤامك ، ببساطه ايامك هتتمحور حوالين بغسل / عايزه اغسل / خلصت غسيل و ف الاخر عمرك ما هتشوفى سبت الغسيل فاضى متحاوليش .
6.انسى بقى خالص انك تستحمى وتغسلى شعرك وتعملى حمام كريم واسكرب لجسمك وباديكير و الكلام ده كله وهو صاحى ، وبما انه مش بينام يبقى انسى الموضوع خالص مالص
7. أقلمى جسمك ع النوم فى اي وقت واى وضع عشان انتى خلاص مبقيتيش حرة نفسك فى شخص مستبد بيتحكم فيكى .
8. انتى خلاص مامى ارضى بالامر الواقع وشيلى بقى المكياج والبرفان الى فى شنطتك وحطى بدالها طقم هدوم زياده وساتر الرضاعه و اكل ومايه وانتينال بتاع الاسهال و حفاضات حاجه مقززززززززززززه جداااااااا
9 . بصي يا حلاوتهم الاكل ده هتكتسبى قدرة عمله باسرع وقت ممكن ودى من مميزات الامومه انك وراكى 6000 حاجه فبالتالى بتعملى كل حاجه بسرعه وسبحان الله بتركيز .
10 . هتتعلمى تبقى DOUBLE_ACTING و DOUBLE_THINKING ولو فى اكتر هتتعلمى عادى يعنى انتى مش صغيره .
11. هتشكى انك مريضه نفسيا لما تلاقى نفسك فى بعض الاحيان عماله تصرخى وتصوتى وفى بعض الاحيان عندك برود السلاحف .
12. هتلاقى نفسك بتمسحى الارض اكتر ما بتستحمى .
13. البيت عمره ما هيبقى نضيف .
14 . دايما الضيوف هيجولك ويلاقوا البيت منيل .
15 . هتقفشى نفسك مرتين تلاته نازله الشارع بشبشب الحمام او لابسه بالشقلوب اعمل نفسك ميت .
16. انتى دايما مقصره فى حق ابنك /بنتك مبتأكليهوش مبتغيريلوش مبتلعبيش معاه .
17. اى مشكله عند ابنك هتتسألى عليها حتى لو السؤال مالوش اجابه ، مبيمشيش ليه ؟؟ مطلعلوش دروس ليه ؟؟ مبيتكلمش ليه ؟؟ احيييه
18. هتتفرجى ع الكارتون غصب عن عينك وهتلعبى بالكوره و بالبازل وانتى رجلك فوق رقبتك .
19. متحاوليش تدخلى التواليت لوحدك دايما معاكى حد يشاركك .
20. متحاوليش تستمتعى بشرب كوباية نسكافيه والا حتى كوباية مايه .
21. اصلا حرام تتغدى بمزاج و متتكدريش لما تقومى 165 مره من ع الاكل عادى .
22.لو بتحبى تقري او تكتبى او عندك اي هوايه انسيها يا بنتى
23. متسبيش موبايلك قدامه والا تسيبى اللاب والا التاب والا الريموت والا اى اسلاك والا اى حاجه اصلا .
24. خبي اى حاجه تخافى عليها بعيد عن متناول ايده ، واى شئ ممكن يتعلق على الحيطه علقيه .
25.لما تكونى فى اوضه غير الى هو فيها و تلاقى الدنيا هدؤ اتأكدى ان فى مصيبه بتحصل " عن تجربه "
26. اى حاجه ضايعه منك هتلاقي راميها ورا الكنبه .
27. الاجهزه الكهربائيه والاليكترونيه بتجننهم حاولى تسيطرى .
28. اوعى تسيبى باب الحمام مفتوح اوعى هتندمى .
29 . اوعى تسيبيه لوحده مع الاكل لان غالبا هتلاقى الاكل بقى ماسك على وشه و على الارض
30.متحاوليش تلبسي اكسسوارات لان غالبا ده هينتهى بحاجه من اتنين يا اما انتى هتتعورى يا اما الاكسسوار هيتقطع ويترمى
31.المناديل الورق كنز بالنسبالهم ، خبيها عشان مش هتتبسطى باللى هيحصل .
32. غالبا بيبقى ابنك / بنتك عارف انه بيعمل غلط وبيبصلك وهو بيعمله وعادى بيكمل مفيش اى مشكله .
33. كل الى عملتيه فى ابوكى وامك هيطلعوا على دماغك اضعاف اضعاف اضعاف .
34. كبري دماغك لان مفيش حل تانى بدل ما يجيلك شوجر واحنا مش ناقصين يا واختشي
35.حاولى تتكلمى مع ناس عندهم نفس حالتك كتير عشان تخففى شويه عن نفسك .
وHave fun اوووووى بالامومه واى حد يقولك خاويه او عقبال المره الجايه اديله بالشنطه ف وش امه اخنفيه

by LaMiaa ShaHeen