السلام عليكم ورحمة الله وبركاته
حاشرح في الموضوع ده طريقة المكرونة بالصلصة الحمراء بتاعتى
ومعاها مكعبات البطاطس المحمرة بالفرن
سلق المكرونة يابنات ياصغيرين
وفيه كمان من المتزوجات حديثا وماأتقنوش الطبخ أيوة ماتستغربوش عادى يعنى بتحصل في بيوت كتيييييييير البنات فضل تدح في المذاكرة وتنسى انها لازم تتعلم الطبخ لانها حتفتح بيت وتكون أسرة ولازم تقوم بمتطلباته بس عادى أنا كنت منهم بس أنا ماكنتش دحيحة على فكرة أنا مخى نضيف لكن للأسف مريت بظروف صعبة شوية وكان منهم مرضية وماعرفتش أسبابها الا من قريب للأسف
المهم عشان مادخلكوش في متاهتى اللى مش بحبها
لسلق المكرونة بتملى نصف الحلة اللى عندك وتحطى فيها ملعقتين ملح كبيرة
وتسيبيها لحد ماتغلى
وتحطى مكرونتك النوع اللى تفضليه وحطى ملعقة خشبية في الحلة عشان الماية ماتفورش وتقع بره الحلة
وقلبي من وقت للتانى لان في نفس الوقت حتكونى بتعملى الصلصة الحلوة بتاعتك اللى حتعوم فيها المكرونة
طيب من غير ماتقعدى تطلعى المكرونة وتشوفيها استوت ولا لأه
تعرفى المكرونة دى استوت ازاى؟
لما بتحطى المكرونة بتبقى في قاع الماية وحتقعدى تقلبى فيها ووقت ماتستوى حتلاقيها ظهرت على وش الماية
ولونها بقى أبيض وجميل
كبي الحلة في مصفاة كبيرة وافتحى عليها ماية باردة عشان تتوقف عن النضج الزيادة
نيجى بقى للصلصة
كيس المكرونة بيبقى 400 جم يبقى حتعملى معاها 300 جم طماطم مع ملعقة صلصة عشان تديها اللون الصح
أو لو بالعدد 4 طماطمات متوسطين في الحجم
أنا بحب الصلة بالتوم بس بس فيه اللى بيحب البصل وفيه بيحب المزيج
لكن عن نفسي التوم بعشقه
حتجيبى 3 فصوص كبار توم وحتقطعيهم بالسكينة مفروم صغنن
حطى 3 ملاعق زيت وانزلى بالتوم ياخد اللون الذهبى وحطى الطماطم بعد ماضربتيها في الخلاط كويس
حطى 1/2 ملعقة ك ملح
و1/2 ملعقة فلفل أسود
ملعقة ص سكر
اليه الهبل ده بقاااااااا فيه حد يحط في المكرونة سكر حاقولكم آه أنا
السكر بيوازن طعم الصلصة مع الملح وبيخلى طعم الصلصة تحفة
على فكرة بعملها في صلصة المسقعة وفي كفتة الأرز كمان
وبحط في برام الأرز سكر برضه
حنحط كمان 1 ملعقة ص زعتر ناشف
1/2 ملعقة ص بابريكا
1/4 ملعقة ص كركم وده بحطه لفايدته الكبيرة
رشة جوزة الطيب طبعا
وتسيبيها تتسبك
تتسبك يعنى ايه ياصغننات
يعنى حتلاقى بدل عصير الطماطم حتلاقيها بقت تقيله كمان بقى فيه فقاعات صغننة بتبقبق على وش الصلصة
هههه حلوة بتبقبق دى
دمى خفيف أنا عارفة شكرا ليكم
وبعدين بعد ماتتسبك الطماطم نحط المكرونة ونقلب كويس عشان الصلصة تتوزع كويس ونديها تسخينة حلوة بسرعة ونقفل عليها تاخد وتدى مع نفسها
يعنى تختلط النكهات ببعض
واللى بعمله ده بيخليها تتشرب الصلصة وفي نفس الوقت تبقى طرية وحلوة
دى قدامكم طبعا مكرونة قواقع بنتى كنزى بتحبها قوى وواجعة دماغى كل يوم والتانى بالمكرونة
ندخل بقى على البطاطس اللى قدمتها مع طبق المكرونة
أنا جبت 3 بطاسطات كبار وقطعتهم مكعبات وحطيتهم في ماية باردة مع ملعقة ملح وسيبتهم عالنار لحد مااستووا طلعتهم وحطيت عليهم ماية باردة عشان يوقف النضج
نجهز التتبيلة اللى ححطها عالبطاطس
ملح فلفل أسود كركم بابريكا زعتر كزبرة ناشفة
ثوم بودر
نقلبهم كويس ورشيهم عالبطاطس وقلبيها كويس عشان التوابل تتوزع كويس
حطيها في صاج الفرن ورشي زيت وقلبى وطبعا تكونى مشغلة الفرن من قبلها بتلت ساعة وحطيها في الفرن في الرف اللى تحت مع التقليب من وقت للتانى عشان تتحمر كويس
وده شكلها
شايفين متحمرة حلو ازاى؟
هنا المكرونة ومعاها البطاطس وقدمت معاهم فرخة مشوية وليا مواضيعى هنا الخاصة بالفراخ المشوية
وبألف هنا حبيباتى