أو

الدخول بواسطة حسابك بمواقع التواصل




https://adlat.net/showthread.php?t=339086
24058 15
#1

افتراضي تجهيزات رمضان من الالف الى الياء

تجهيزات رمضان من الالف الى الياء
خلاص ايام وينورنا شهر رمضان
بس الايام بتجرى بسرعة والمفروض نقسم الجهد والتكلفة والوقت عشان منتعبش ده اولا ...

طيب هنعمل ايه وهنبتدى من امتى
السطور القادمة ممكن ترشدك لافكار كتير ممكن تعمليها وطبعا مش لازم تعمليها كلها لكن اختارى منها اللى يناسبك وزودى عليها او احذفى منها بما يتناسب مع احتياجاتك وميزانيتك ... مرة ثانية هذه التجهيزات للاختيار منها حسب امكانياتك






نبتدى امتى بقى .. ممكن من النهاردة نبتدى نجهز فى الحاجات دى شوية شوية وكده مش هنحس بعبء على بنود الميزانية

وخلينا فاكرين نستعمل اكياس اكبر شوية من الحاجة اللى بنحفظها فيها عشان نعرف نبططها ومتاخدش مساحة فى الفريزر وده طبعا بالنسبة لكل حاجة بنحفظها لان كل ماكنا منظمين كل ما الفريزر استوعب كميات اكبر وكل ما وفرنا وقت وجهد فى رمضان وفلوس كمان لان الحاجات بتبقى اغلى

وكل سنة وانتم صائمين عابدين شاكرين موفرين غير مبذرين
كل سنة وانتم طيبين واللهم بلغنا هذا الشهر الكريم لا فاقدين ولا مفقودين
وياريت اللى عنده اضافة او فكرة زيادة يزودها فى الردود جزاكم الله خيرا
والمشاركات الجاية
التجهيزات من الالف الي الياء
تابعونى

تجهيزات رمضان من الالف الى الياء



إظهار التوقيع
توقيع : حنين الروح123
#2

افتراضي رد: تجهيزات رمضان من الالف الى الياء

ض





تسبيكة الخضار
هتشوفى هتعملى كام طبخة وليكن طبخة اسبوعيا يعنى اجنا محتاجين اربع تسبيكات .. هنجيب حوالى 2 كيلو طماطم وبنجراية مقشرة ونضربهم فى الخلاط وفى حلة نشوح اربع بصلات كبار فى خمس ملاعق من السمن او الزيت .. ثم نضيف الطماطم والبنجر المضروب فى الخلاط ونتبلها بملح وفلفل وجنزبيل ونسيبها تتسبك ... ونرفعها من على النار لتبرد ثم نقسمها على اربعة اكياس وخلينا فاكرين نستعمل اكياس اكبر شوية عشان نبططها ومتاخدش مساحة فى الفريزر وده طبعا بالنسبة لكل حاجة بنحفظها

رد: تجهيزات رمضان من الالف الى الياء

تسبيكة المحشى
ودى باعملها بحوالى كيلو بصل او اكثر شوية يتشوح فى الزيت لغاية ما لونه يشف واضيف له برطمان صلصة مذوبة فى الماء " من الصلصة اللى احنا عملناها والطماطم رخيصة " او برطمان صلصة جاهزة ومعاها طماطمايتين ثلاثة مبشورة عشان تديها طعم الطماطم الفريش ونتبل بملح وفلفل ولما تتسبك نضيف 3 حزم كبيرة مقطعة صغيرا جدا بالعيدان من كل من البقدونس والكسبرة والشبت يعنى المجموع 9 حزم وتقليبتين ونطفى عليها ونسيبها تبرد وتتقسم فى اكياس حسب الكمية اللى انت متعودة تعمليها
عند استخدامها يضاف للخلطة بصلة متوسطة مبشورة نية وملعقة صغيرة نعناع بودر ولو محشى كرنب نزود ملعقة كمون وتقلب ويضاف الرز



تسبيكة المكرونة
جهزى تسبيكة المكرونة وضيفى لها ملح وفلفل وجنزبيل وبودرة بصل وقسميها فى اكياس صغيرة وجمعيهم فى كيس واحد لتمييزهم



تسبيكة الفتة
لو ناوية تعملى فتة فى رمضان جهزى الصوص بتاعها بالخل والتوم وشيليه فى برطمان على رف التلاجة لو تلاجتك كويسة او فى الفريزر ... شوحى التوم المفروم فى السمن واطفيه بالخل ثم ضيفى عصير الطماطم وتبلى بملح وفلفل وسبكيها وطبعا الكمية حسب عدد المرات وكل مرة فى برطمان صغير



تسبيكة الكمونية
لو بتحبى تعملى كمونية مع الملوخية وانت بتعمليها مرة قبل رمضان ضاعفى الكمية وشيليها فى برطمان صغير فى الفريزر لرمضان شوحى التوم المفروم فى السمن وضيفى عليه الكسبرة ولما يلونوا مع بعض ضيفى الصلصة او عصير الطماطم والكمون والملح وسيبيها تتسبك



الشوربة
_شوربة اللحم والفراخ يراعى تخزينها فى اكياس صغيرة لنجيد استخدامها دون هدر بحيث يكون متاح لك استخدام كيس واحد او مضاعفة الكمية حسب الحاجة

_نوعى فى الشوربة ... فى اكياس صغيرة احفظى بنجر وبسلة وكوسة وقرع عسلى وكرنب اخضر واحمر وبروكلى كل نوع على حدى لعمل شوربات مختلفة



العصاج
_وده بنحتاجه لوصفات كتييييير جدا وعشان نزود كميته نضيف بصل كتير وجزر مبشور وكوسة مبشورة ... يعنى كيلو المفروم ياخد حوالى ربع كيلو من كل من البصل والجزر والكوسة
وكده ممكن تقسميه على خمس اكياس
_لو عايزة توفرى اكثر استبدلى عصاج اللحمة بعصاج الفراخ المفرومة واعمليه بنفس الطريقة



تحابيش
_هنعمل خلطة حشو من عصاج الحمة ببصل كتير ومضاف لها فلفل رومى مكعبات وزيتون اسود او اخضر مفروم ونعمل ايه بقى نجيب لفة او اتنين جلاش ونعمل اصابع محشية بالخلطة دى ونرصها فى طبق فوم وبين كل طبقة والتانية كيس نايلون
_بصدر فرخة مقطع مكعبات صغيرة متشوحة مع بصل وفلفل الوان او اخضر فقط نعمل حشوة للكانيلونى وبرضه نحفظه فى طبقات بينها كيس نايلون فى طبق فوم
_بلفة جلاش نقطعها زى السمبوسك عشان تبقى اوفر نعمل سمبوسك بالجبنة القريش والزعتر او الكمون حسب الرغبة وممكن بالخضارالمشكل .. او بالسبانخ المتشوحة بالتوم ونحط كل نوع لوحده فىى طبق وبعد ما يتجمد نرصه فى كيس ونستغنى عن كل الاطباق ما عدا واحد فقط تحت لحفظ القوام مع توفير مساحة فى الفريزر
_ ممكن تعملى عجينة الكريب و تحتفظى بالأقراص هى اللى تجمديها و لما تسيح تبقى إحشيها عادى خالص بس خلى بالك بين واحدة والتانية كيس نايلون




المحمصات
_كيلو شعرية او المقدار اللى متعودة تستعمليه فى الشهر وحمصيه على النار او في الفرن بدون دهون وبرديه واحفظيه فى بطرمان زجاجى فى دولاب المطبخ وهيبقى عندك جاهز للرز والشوربة
_كيلو لسان عصفور حمصيه واحفظيه بنفس الطريقة السابقة ينفع للطواجن وللشوربة
_جمعى بواقى العيش البلدى وقصيها مكعبات بالمقص وحمريها فى الزيت او حمصيها فى الفرن واحتفظى بها فى برطمان زجاجى فى دولاب المطبخ ليوم تعملى فتة متخافيش مش هيجرى لها حاجة

_بنفس الطريقة جهزى العيش الشامى لفتة الشاورمة
_لو بتحبى المكرونة المحمرة برضه حمصيها وجهزيها بنفس الطريقة
_حمصى العيش الفينو واطحنيه لعمل بقسماط وبهريه بالبهارات اللى بتحبيها

إظهار التوقيع
توقيع : حنين الروح123
#3

افتراضي رد: تجهيزات رمضان من الالف الى الياء

البانية
_شرائح فراخ بانيه جاهزة على التحمير يعنى مبطنة ببيض وبقسماط .. او زبادى وبقسماط حسب المتوفر
_بفتيك جاهز على التحمير كالسابق




اللحوم
_لو هنطبخ بلحوم فممكن نسلق كمية اللى هنستعملها طول الشهر ونقسمها فى اكياس تكفى الطبخة وطبعا نحتفظ بالشوربة سواء فى اكياس منفردة او بكيس اللحم على قد الطبخة
_اعملى عرق تريبيانكو لحمة باردة "روزبيف" وقسميه فى اكياس على قد الوجبة بينفع فى وقت زنقة يبقى جاهز مع شوية مكرونة وسلاطة




الكفتة
هنجهز اطباق من الكفتة البانية جاهزة بالبيض والبقسماط على التحمير
كفتة الفراخ جاهزة على التحمير
كفتة رز سواء بلحمة او نباتى متصبعة ومتحمرة
كفتة بطاطس جاهزة على التحمير
كفتة عدس جاهزة للتحمير او الفرن
كفتة داوود باشا نباتى متشكلة كور ومتحمرة





الطيور
_للسلق تحفظ نية وتطهى وقت الحاجة مبتاخدش وقت لان طعمها بيغير لما تتشال مستوية
_الشيش طاووك شيليه وتبليه واحفظيه جاهز على الشوى وممكن تشيليه متشيش فى العيدان الخشب بعدد افراد الاسرة
_الكوردون بلو لوهتعمليه برضه يبقى جاهز بالبيض والبقسماط على التحمير ومتقسم حسب عدد افراد الاسرة وانا باحب ادخله الفرن شوية بعد التحمير عشان اضمن سواه
_لو هتعملى مرة وجبة حمام او سمان ممكن تجهزيه وتحشيه فريك وتسلقيه ويبقى جاهز على التحمير لكن الارز مبينفعش الا لما تزودى له البصل وميقعدش كتير يعنى اعملى حسابك تاكليه فى الايام الاولى




الخضار
_طبعا بناء على جدولك الخاص هتجهزى اكياس من الخضار سواء بسلة فاصوليا سبانخ قلقاس ولوازمه وخلافه من اللى انت واسرتك بتحبيه ويبقى متخزن فى الفريزر على الطهى وكمان تفرزى كرنب وورق عنب حسب احتياجاتك
_ -تفريز الاعشاب ذي البقدونس والكزبره والنعناع والكرفس لانهم بيأخدوا وقت ف التنظيف والفرم يبقوا جاهزين على الاستخدام بتتعمل مكعبات او تتقطع صغيرا وفى اكياس




الفلفل الالوان
قطعى الفلفل الالوان شرائح رفيعة "جوليان" واحفظى كل لون فى كيس وقت الاستخدام تاخدى منه الكمية اللى انت محتاجاها على النار على طول ... واحتفظى باكياس اخرى مقطعة مكعبات





البقول
_اسلقى فاصوليا بيضاء وقسميها فى اكياس للطبخ او السلاطة وزيها اللوبيا والفاصوليا الحمراء
_اسلقى حمص وقسميه فى اكياس صغيرة للسلاطة وفتة الشاورما والكشرى




صوانى
ممكن تجهزى الصوانى دى على دخول الفرن لو عندك مكان ” ديب فريزر“
الجلاش والرقاق والمسقعة والمكرونة البشاميل بالسبانخ او بالعصاج




اشياء مساعدة
_جهزى كمية من مرقة الدجاج البيتى هتنفعك فى الشوربة اليومية لو مخزنتيش شوربة كفاية
_جهزى تتبيلة السمك فى برطمان بالتلاجة تسحبى منه على طول
_لو الرز اللى بتشتريه بيتنقى نقى كمية تكفى الشهر
_اطحنى نصف كيلو سكر للحلويات وكعك العيد
_لو بتحبى المخللات فى رمضان "انا لا افضلها" جهزى الانواع اللى بتحبيها قبله بشهر مثلا حاجة حاجة على مهلك
_لو بتحبى البيتزا فى رمضان جهزى العجينة وقسميها وفرزيها وكمان جهزى الصوص واحفظيه فى التلاجة

_عمل ثوم مفروم و تجميده مفروم فى علبه محكمة الغلق او كيس بلاستيك مبطط ومتقسم مكعبات صغيرة بظهر السكين او بمسطرة للاستخدام السريع ... و شوية ثوم مفصص بدون فرم لوحدهم
_عمل عصير كميه من الطماطم المعصوره و تعبئتها فى أكياس فى الفريزر و إذا لم تتمكنى من ذلك ممكن تجميد الطماطم كما هى و عند تسييحها حتلاقى قشرتها إنفصلت عنها ...إنزعيها و إضربيها فى الخلاط بتبقى كأنها طازجه بالظبط



ترتيب الفريزر
_ قومي بتقسيم اللحوم إلى كميات صغيرة وإعادة تغليفها بإحكام وتجميع اللحوم المغلفة من نفس النوع ووضعها داخل كيس تفريز كبير الحجم مكتوب عليه الصنف

_اتبعى نفس الطريقة بالنسبة لكل ماتفرزين بحيث يسهل عليكى الوصول للصنف المطلوب بسرعة
_إحرصي على عدم تكديس الأطعمة فوق بعضها وضعيها بطبقات فردية لتضمني توزيع الهواء البارد بصورة متساوية
_قسمى الفريزر رف للطعام النئ من لحوم وفراخ .. ورف للخضروات والاطعمة شبه الناضجة مثل الصلصات والسمبوسك والمحاشى ومثيلاتها .. ولو متوفر ديب فريزر يبقى درج للفراخ وواحد للحم وواحد للخضروات وواحد للاطعمة شبه المعدة وهكذا
السحور
_طبعا مش هننسى ندمس كيلو والا اتنين فول حسب استهلاكنا الطبيعى فى الشهر ونقسمه فى اكياس على قد الوجبة


إظهار التوقيع
توقيع : حنين الروح123
#4

افتراضي رد: تجهيزات رمضان من الالف الى الياء

Fuchsia

Fuchsia








رد: تجهيزات رمضان من الالف الى الياء

الحلويات
_القطايف " وطبعا ممكن تعمليها فى البيت " احشيها وفرزيها فى اكياس صغيرة على قد استعمال اليوم اول بأول كل فرد قطعتين مش عايزين جسمنا يتقل ووزننا يزيد .. الصيام فرصة جيدة لضبط الوزن
_العسل "السيرب" جهزيه على الاستخدام فى برطمانات زجاجية فى

دولاب المطبخ
_البلح فصصيه وشيلى النوى وشيليه فى شنطة بلاستيك بدرج التلاجة
_المشمشية قطعيها وشيليها فى برطمان زجاج برف التلاجة ونفس الشئ بالنسبة للتين والقراصيا لو كنتى بتستخدميهم للخشاف
_جهزى خلطة حشو الحلويات من سودانى مجروش "مش هنجيب مكسرات" وجوز هند وزبيب ومعلقة سكر واحفظيها فى علبة اوبرطمان زجاج فى رف التلاجة
_جهزى اصابع جلاش محشية بالخلطة السابقة فى اطباق فوم جاهزة على التحمير وطبعا عندك العسل جاهز
_الكنافة قطعيها وحمريها فى السمن وقسميها فى اكياس ومتكتريش يعنى حطى فى الكيس مقدار يعمل قطعة لكل فرد فى الاسرة واعملى صابح بصابح افضل وممكن تعمليها على البوتاجاز من فوق فى صينية صغيرة وتقلبيها


رد: تجهيزات رمضان من الالف الى الياء

العصائر
لوعندك مكان ابدئى جهزى اكياس صغيرة من فاكهة الموسم لضربها فى الخلاط وعمل عصير سريع
برتقال .. فراولة .. جوافة .. الى اخره من الفواكه المتاحة حتى رمضان

رد: تجهيزات رمضان من الالف الى الياء

ملابس العيد
واخيرا اشترى لبس الولاد للعيد قبل رمضان لان الاسعار بتغلي وبتبقي الجوده أقل وطبعا ده غير الزحمه والوقت الضائع ولو قررتى توفرى وتفصلى لهم بايدك فبرضه خلصيهم بدرى بدرى عشان تتفرغى للعبادة واحرصى انك تنتهى من اى مجاملات عاجلة قبل رمضان


رد: تجهيزات رمضان من الالف الى الياء


كعك العيد
ياريت لو كنتى ممن يفضلون عمل الكعك والبيتى فور والبسكويت وخلافه ان تعديه قبل رمضان بكام يوم وتحفظيه فى علب كارتون لكن لا تضيفى السكر للكعك الا اخر يوم رمضان وكذلك لو هتضيفى مربى وخلافه للبيتى فور وطبعا بلاش كميات كبيرة اعملى من كل نوع كوبايتين دقيق كفاية قوى عايزين نوفر جهدنا ووقتنا فى رمضان للعبادة تقبل الله منا ومنكم



رد: تجهيزات رمضان من الالف الى الياء

عبوات للتوزيع
_لو متعوده تخرجى ولو وجبة يوميا جزاكى الله خيرا .. جهزى عبوات تصلح للتوزيع سواء هتشتريها اوهتستخدمى علب الجبنة والحلاوة وغيره على سبيل التوفير مش مشكلة المهم النية وربنا يتقبل
_نظفى شقتك واغسلى ستايرك وسجاجيدك قبل رمضان
_خلوا العزايم فى العيد انا شخصيا نادرا لما باعزم اواتعزم فى رمضان


رد: تجهيزات رمضان من الالف الى الياء


زينة رمضان
اكتفى بزينة رمضان بتاعة السنة اللى فاتت وممكن تزودى عليها حاجات بسيطة تعمليها بايدك مع ولادك زى ما كنا بنعمل واحنا صغيرين بس ما تعلقيهاش الا قبل رمضان بيوم

إظهار التوقيع
توقيع : حنين الروح123
#5

افتراضي رد: تجهيزات رمضان من الالف الى الياء

الله ينور عليكي ويفتح عليكي ياجوجا بجد كفيتي ووفيتي
تسلم ايدك وكل سنه وانتي طيبه ياقلبي

إظهار التوقيع
توقيع : جنا حبيبة ماما
#6

افتراضي رد: تجهيزات رمضان من الالف الى الياء

مبروك التثبيت ياحبي

إظهار التوقيع
توقيع : جنا حبيبة ماما
#7

افتراضي رد: تجهيزات رمضان من الالف الى الياء

الف شكر حبيبتي و كل سنة و انت طيبة
مبروك التثبيت

إظهار التوقيع
توقيع : إشرآقـــة أمل
#8

افتراضي رد: تجهيزات رمضان من الالف الى الياء

جميل جدا

#9

افتراضي رد: تجهيزات رمضان من الالف الى الياء

تسلم ايدك وكل سنه وانتي طيبه ياقلبي
ومبروك التثبيت ياجوجا

إظهار التوقيع
توقيع : ام سيف 22
#10

افتراضي رد: تجهيزات رمضان من الالف الى الياء

جزاكي الله كل خير
#11

افتراضي رد: تجهيزات رمضان من الالف الى الياء

تسلمى على التوبيك الشامل

رمضان هيجيى عليا وانا متزوجه ان شاء الله وهبقى اعمل كل ده فى بيتى ان شاء الله

#12

افتراضي رد: تجهيزات رمضان من الالف الى الياء

مشكوررررررررررررررر
إظهار التوقيع
توقيع : سنية توفيق
#13

افتراضي رد: تجهيزات رمضان من الالف الى الياء

موضوع مهم
#14

افتراضي رد: تجهيزات رمضان من الالف الى الياء

تسلمي يا سكره

مشكـــــــوره

إظهار التوقيع
توقيع : حياه الروح 5
#15

افتراضي رد: تجهيزات رمضان من الالف الى الياء

شكرااااااا
#16

افتراضي رد: تجهيزات رمضان من الالف الى الياء

شكرااااا على الموضوع
أدوات الموضوع


قد تكوني مهتمة بالمواضيع التالية ايضاً
الموضوع كاتب الموضوع المنتدى
اسماء بنات جديدة2022 من الالف الى الياء ,اسماء بنات رقيقة ومعانيها اسماء لمولودك sηfoorћ♪'  اسماء بنات
كل ما تحتاجه العروس من الالف الى الياء,جهاز العروس الشخصى من الالف الى الياء العدولة هدير نصائح وترتيبات
قواعد النطق للغة الفرنسيه للمبتدئين محبة صديقاتها اللغة الفرنسية français
أحاديث قدسيةللرسول صلى الله عليه وسلم مرتبة أبجدياً لؤلؤة الاسلام 1 السنة النبوية الشريفة
طلبات النساء .... من الالف الى الياء هههههههههههه سوسو الامورة فرفشة عدلات


الساعة الآن 04:08 AM


جميع المشاركات تمثل وجهة نظر كاتبها وليس بالضرورة وجهة نظر الموقع


التسجيل بواسطة حسابك بمواقع التواصل