لعدولات اسكندريةعايزة الصراصير تختفي من بيتك سنة بحالها تعالي

ازايكم يا عدولات
طبعا كلنا عارفين عجينة الصراصير اللي في الأسواق واللي الصرصار من دول ياكلها ويبصلك ويهز شنبه ويقولك كمان
حقولكم بقى على سر العجينة اللي بجد
العجينة اللي تخليهم يختفوا من بيتك سنة بحالها ومفيش واحد فيهم حيفكر ويتهور ويهوب يمة بيتك
العجينة دي انتي بتعمليها في البيت وطبعا حناخد احتياطاتنا يعني مثلا
* تلبسي كيس بلاستيك في ايديك * تعجنيها في حاجة قديمة مستغنية عنها
* تستعملي 2 معلقة بلاستيك من اللي بتيجي مع علب الكشري حتستعملي واحدة لتقدير كمية السم علشان تشتغلي بيها وترميها بعد كدة والتانية لتقدير باقي المقادير
نيجي بقى للمهم




المقادير
* المادة الفعالة اللي هي السم اللي حيقضي عليهم ان شاء الله وده بتشتريه من " معرض شركة الشرق الأوسط للتجارة <ميكو>" وده موجود قصاد نقطة شريف بالزبط بتجيبي كيس واحد سعره تقريبا 3.5 جنيه والكيس مكياله 18 معلقة بلاستيك " بتاخدي 6 معالق بس "
* 2 معلقة دقيق
* 2 معلقة سكر
* 2 معلقة لبن بودرة
* 1/8 كوب ماء
الطريقة
* بنخلط المقادير مع بعضها ونعجن بالماء حتى تحصلي على عجينة متماسكة بس خدي بالك ان فيه دقيق بيشرب المية ودقيق لأ
* بتاخدي منها جزيئات صغيرة وتحطيها في كل مكان في الشقة حتى بين ألواح السرير وقوليلي للصراصير باي باي
آه على فكرة مواعيد معرض الشركة من الساعة 9 صباحا الى 9 مساءا
والعطلة الأسبوعية يوم الجمعة
وعلى فكرة كمان هما في الشركة بيدوكي ورقة فيها المقادير والطريقة