قصيده للشاعر : خلف بن هذال العتيبي في حج عام 1431ه في الدفاع عن السيده

قصيده للشاعر : خلف بن هذال العتيبي في حج عام 1431ه في الدفاع عن السيده عائشه رضي الله عنها



قطعت البارحه صحراء ورى صحراء وسبع بحور = أدوّر ذاهبه من وسمي المعروف واسمها


تذكّرلي وانشّد عن حلوبٍ ديدها مصرور = لعل ألقى الذهيبه عاطفه وأشرب مقادمها


حلاوي درّها الدافي ولايبقى خلافي سور = حلالٍ لي وأنا جيعان تطعمني واطعّمها


حصيلة شاعر يخضع لفكر ومعرفه وشعور = هواتف مهجته ماتحضر الا وقت موسمها


أسوق القافيه متقافيه صوره ونقش سطور = سطور المسطره والذاكره بالحبر ترسمها


أركّبها ولولبها وأجنّبها عن المحذور =وأراقبها واهذبّها وأرتّبها وأنظّمها


من التقصير مافيها قصور ولاعليك قصور = عروس الشعر عذرا يذبح العشاق مبسمها


كساها الستر خدٍ مستتر ومعنّقٍ مستور = حمتها غيرة المسلم ولاغيرك ينادمها


خواصرها يسوج بها البريم وباليدين خصور = عليها تاج رمز اهل الشرف عشرٍ خواتمها


نصت شخصك تخطّى للسلام بعطرها المنثور = عليك وبارك الله فيك بين ايديك أقدّمه

ا
سلام الله على عاهل وطنّا قايد الطابور = ليا صكّت طوابير العدا طابور يهزمها


تجي منه الأوامر صادره وينفّذ المامور = رجالٍ في وطنها ماتخلّت عن محارمها


على الخوذه شعار حماة دار ومحتمين الدور = منوّخة الحريب من السطر ترمي عمايمها


جنودك في حدودك ياملكنا والعدو معثور = يموت بحسرته واحلامه اللي كان يحلمها


وطنّا بالعمار الغاليه تدفع عليه مهور = تعيش أغلى بلاد وبيّض الله وجه حاكمها


ملك عادل من الدين الحنيف يطبّق الدستور = على أكبر راس وأصغر راس والأفواه يرجمها


حليم ومبتسمٍ وليا غضب زلزل حمم وصخور = اذا شفت الاسود احذر توهّق في تبسّمها


يا ابن عبد العزيز المنتصر يالناصر المنصور = نصرك الله بنصر الدين والسنّه مقوّمها


على ماقمت به مشكور في جمع العرب مشكور = حملت اسم العروبه وانت الاول من دعايمها


ردمت الدرب ردم بهندسة ذهنك نصبت جسور = تصدرت الزعامه كفو من حقك تزعّمها


عسى عيدك سعيد وطال عمرك في فرح وسرور = تواصل رحلتك وتطوّر أوطانك وتكرمها


ولانرمي من العاقل مشوره وانت راعي الشور = ولانبدي على الجاهل سريره ثم يعمّمها


ولاناخذ من أشوار الردي وأصل الردي مثبور = بضاعه خاسره في سوقها محدٍ يقيّمها


ضعيف العقل ماعنده دماغ وفي الفراغ يدور = مثل ثورٍ مع المنحاه منحاته ملازمها


تهاب الرجل من شخصيته وليا هرج ديكور = ليا ألتمّت به الاخصام يجبن مايخاصمها


ولانحكي ولانشكي ولو شفنا جفا وعسور = عزيز النفس دايم حاجته بالصدر يكتمها


حفضك الله وردّ الله اميرٍ بالثنا مذكور = ياكم لحيه وكم شارب دسم كفّه يدسّمها


كريم ليا حلب صافي تفيّض من عطاه قدور = ولاتذكر عطايا الناس لو كثرت دراهمها


وليّ العهد ابو خالد عن الاوطان درع وسور = عظيم ليا أظهرت موسوعة العالم عظايمها


سعوا حجاج بيت الله بأمان وحجّهم مبرور = تحت تنظيم نايف قوة الحجّ يتقدّمها


دعينا الله يعينه يندعاله بالدعاء الماثور = له التوفيق ويسهّل مهمّاتٍ تسلّمها


وزير ونايبٍ ثاني عمل ومثابره وامور = امورّ مرهقه بادراك ينقضها ويبرمها


تمور الأرض وتمرّ بحراره والجبال تمور = ولاندري وش اللي صابها وأخلف معالمها






علوم الشرق الاوسط يلتهب ممابدا مخطور = ولو طارت شراره تحرق الدنيا بأوادمها


على خشم الزناد ولو يحرّك يلتمس ويثور = معاذ الله من الفتنه ومشعلها ومضرمها


وعد بلفور لابورك ولابارك وعد بلفور = غرس جرثومةٍ غطّت على العالم جرايمها


تدوس القدس دوس وبالخدع تذبح نساء وبزور = متى شهب السماء مع غطّت النيّام ترجمها


على الاسلام حرب ٍ ضاريه ولسانها مسعور = على يدها الدمار وتنفث الارهاب من فمها


وش اللي نسمعه عن عايشه من مسرفٍ مغرور = تخبّط مايسمّي ظالمٍ نفسه وظالمها


خسيس ومفتري مقباس شر ومن وراه شرور = خسى الخاسي خسى كيف يتجرّا النذل يتهمها


ماجوره زوجة أشرف ماخلق وأبو بكر ماجور = الاه الكون في رحمتك تدخلها وترحمها


هي ام المومنين المومنه جارة بنات الحور = بجنة عدن محجوبه عن النار وسمايمها


ولا مسّوا لها شعره براس ابره وراس أضفور = نزيهه عايشه ربّي عن التدنيس عاصمها


هي بنت اللي نجا مع صاحبه في غار قمة ثور = شمخ ذاك الجبل عن قمّتّه تقصر حوايمها


تمالوا بينهم ياقوم دمّه بيننا مهدور = ولله المثل منزل رسالاته يتمّمها


لقوا بيض الحمامه والحمامه مآأعظم المنظور = هذيك العنكبوت ببيتها سبحان ملهمها


تشوف عيونهم غارٍ سنين من البشر مهجور = وهو يسمع حوافر خيلهم تقضع شكايمها


فلا وجهٍ لهم يندأ ولاذنبٍ لهم مغفور = عناصر جاهليّه غافر الزلات محرمها


هبوا واستدبروا والكل منهم يلتفت مذعور = تردّوا وأفلسوا من هادي الامه معلّمها


عليه أزكى الصلاه المصطفى بيت الهدى والنور = له الغزوات بحروف الذهب تكتب ملاحمها


ففي غزوة بدر قبله سبور وبالجنوب سبور = على الماء يوم جات قريش قنّعها هزايمها


حذف سبعين جوف البير للضبعا عشاء ونسور = تكاسر للعشاء وأفطر من الامساك صايمها


وفي غزوة أحد جاله على كل المحاور دور = وقف بين السرايا بأطيب الجدان يزهمها


تنادوا يامحمّد يامحمّد لك عهد ونذور = صحابه للشهاده والفداء صكّت محازمها


ترجل هاشميٍ للجهاد محنّكٍ ممرور = ليامنه تعقب خطةٍ للحرب يحكمها


أعاد الكرّ بالحدّ الرهيف لحزّته مذخور = تشوف القوم صرعا والجثث تفقد جماجمها


أراد الله يحق الحق وابليس العور مدحور = توارت هيبة الكفار وانهارت عزايمها


بعدها غزوة الخندق دشم وحفور خلف حفور = دفاعً عن المدينه حتى الاعداء ماتهاجمها


ثنا عنها وحصنّها وصارت للغزاه قبور = نجا منها شرايد قاطع الطرق يتغنّمها


وفي مؤته جيوش الروم تردم كبر خشم الطور = فرق تتبع فرق ياكثرها ياقلّ سالمها


تشاهد لك جرادٍ منتشر فوق الوطا منشور = بهايم وارده للموت راكبة ً بهايمها


سرت تسحب ذيول الذل خزي وباسها مكسور = من المهزوم قامت تجمع الامه غنايمها


تلقّى الدرس ماينسى يطاردها لنفخ الصور = بعد ماذاقت أنواع الفنا ماقام قايمها


وفي غزوة حنين المعركه والموقف المشهور = صمد مستبسلٍ في حومة الجبهه يقسّمها


على الأحزاب زمجر نخوةٍٍ هزت ظلال وزور = انا وانا ابن عبد المطلب والروس أحجّمها


نبيٍ ماكذب ملائكة ربي عليه حضور = نهار يسل سيفه والجموع يعوم عايمها


فتح مكه ملبي بالحرام وطاف بالمعمور = امام المسلمين وسيد الكعبه وخادمها


دعى لعبادة المعبود وأنهى كل ظلم وجور = وأزال الشرك والاصنام نكّسها وحطّمها


عفى واعفا وكف الايدي وأعتق المأسور = وجاب اهل المظالم قاطبه وأرجع مظالمها


فلا تفريق بعد اليوم لا قاهر ولا مقهور = ترى هذي سجايا الأنبياء تضفي مكارمها